أرجوكى .. لا أملك نبق
ولا كان بإيدى تدخلى .. أو .. تخرجى
ولا كنت أملك ياحبيبة قلبى .. أفتح بابى
لاجل تبصى .. إوعى ف أى يوم تتفرجى
نصى جراح .. نصى قلق
لا أقدر اجيبلك يوم حلق
ولا هاوهبك .. إلا السواقى الناشفه فى غيطان السكوت
لحظه باعيش .. وساعات بموت
فبلاش تسيبى على بيبانى الدايبه إسمك .. إهربى
عطشانه ؟ نفسى .. بس مش ممكن معايا ها تشربى ..
إلا السهاد
إيه اللى خلى القلب يرجع تانى يتمنى الميلاد
والعمر مش ممكن يعاد .. ياطيبه
هارسم على صدرك شراع للمركبه
وهادارى ضوء الشمس
مش عايزك تشوفى فى العيون .. ذكرى الصبا
كل اللى كان حواليّه .. مات
كل اللى بان فى عنيّه .. أصبح ذكريات
حتى انتى .. شايفك بسمه من مليون سنه
حتى انتى شايفك سوسنه .. فى جيب جاكته قديمه ..
من عهد الطواقى .. و الوجوه المؤمنه
صبيتى فىّ الحزن .. كان حزنى القديم
يكفينى ميت مليون سنه
وباحب فيكى محبتك
وباحب فيكى مناقشتك
وباحب فيكى تراجعك ..
عن أى شئ يضايقنى .. أو يتعب فى قلبى اللى انكسر
شفتك بقلبى .. نفسى اشوفك بالبصر
يا ام القميص شفاف دخلنى .. واختلط بالأورده
عمر العواطف مهما كانت .. تبقى يوم متحدده
ممكن تكون متجدده
لكن بتهرب من جميع الأمكنه
لو يوم( هروب ) منها دنـا
أو لحظه باست فى الملل
آه يازلط .. جوه الحلل
الجوع قتلنى منذ أعوام الطفوله المعدمه
والسجن داسنى .. فقدت عمرى فى زحام المعتقل
والتحقيقات .. والتهديدات
والضرب قاسى بدون سبب
حطى إيديكى على الجراح المره .. قومى لملمينى .. برعشتك
إبكى على كتفى اللى مال
واتدارى منى فى المخده البايشه من عرق اللقا
اللى حضن فى رقبتى ..لأه .. مش قطان .. دا مشنقه
والأوضه لسه ضيقه
وعروقى لسه ضيقه
ودروبى لسه ضيقه
ورجعت تانى .. برغبتى .. أرسم خيوط للشرنقه
واهرب من المليون حقيقه .. للسكون
يا حبيبتى .. يمكن تعترينى ف لحظه رعشات الجنون
واهرب من الخيمه اللى فيها بلوزه .. فوق مسمار قديم
وأسيب عشانك شِعر يقدر يوصفك
كان نفسى أقدر انصفك
وأصالح القلب الكسير
ياحبيبتى ع الأيام .. واصالحك ع الزمن
بس الوطن .. ما بقاش وطن
بس الصديق .. ما بقاش صديق
ولا ع الطريق . جنة عدن
بس العطن .. دخل النفوس من جوه ..
خلى الدم يهرب م العروق
والشمس كرهت فى الشروق
ووقعت من فوق الجبل ..
مجروح .. وداسنى حصانى فى بدء السبق
أرجوكى .. لا أملك نبق
ولا نخله توهب كفتك .. ضله عشان الليل ينام
نامى فى جيبى واحلمى
يمكن يعود السندباد الفاضى .. لو تتكلمى
يمكن أعود من تانى أعزف من جديد
غنوة محبه تصحى ديكك ع السطوح
أرجوكى .. مش قادر أمام الناس أبوح
وأروح لكل مكان ..
أدوّر ليكى عن جورنان يدارى دمعتك
إنتى مداريّه عنى إيه
حاسس كأنك فوق حبال الصبر .. ماشيه .. بألف شئ تتمرجحى
لو تسمحى .. صارحينى ..
يمكن اشارك القلب اللى دايب دقته
يمكن أحط جراحى .. داخل روحى .. واقدر أنقذك
من أى حاجه تعكر البحر الرقيق
لو كان لقلبى يوم طريق
أنا كنت هاقدر أطرحك .. شجره ..
تخلى الكون ضواحى .. وبيت يساعى قلبنا
بس المحيط اتدارى ساعه ما احنا جينا ننزله
لا قدرنا تانى نغزله
ولا شفنا نهر النيل سمك
إتفضلى ..آدى القميص ليكى شبك
واللى اتشبك .. قلبى وقلبك جوه صنارة خروج
النيل ما عادش فى قلبه موج
وانا زى موج النيل .. سراب
دقى على الباب الكبير .. هاتلاقى بعده ألف باب
صندوق فى جوف صندوق .. فى جوف صندوق
وريشه من جناح .. عصفوره لسه ميته
دخل الشتا جوايا .. صابنى .. لقيت لحافك فزدقى
فاتشرنقى فىّ غريبه من العيون الضيقه
فى قلب شريانى المدمر .. إشرقى
واترقرقى ميه شريفه واصدقى
وإن يوم دخلت شرانق الموت العفيف
إوعى فى يوم تبكى علىّ .. أو فى يوم تتشرنقى
ليست هناك تعليقات:
إرسال تعليق