التجربه رقم 54 من ديوانى عن الشخص الآخر

التجربه رقم 54 من ديوانى عن الشخص الآخر

إنسان..بلحم و دم..ايوه..

ما يعرفوش.. غيرى أنا

دايما إذا كتب القصيده..

يعيد فى كلمة سوسنه

حقق بدون ما يساعده صاحب..

كل حاجه ممكنه

لكن سيادة النُص..

كان جواه بيقلق..

رعشته فوق الورق

أوقات يقوله..

*بلاش كتابه..

مفيش كتابه مجزيه

سكه عقيمه..مخزيه

و العمر بالقلم انحرق

يا تسيب بقى الأوراق..

يا إما..نفترق *

................................

ما سمعشى قوله..و قال و قال

سابه و هاجر..

بعد ما عمر الصديق..

كله انسرق

و اما رجع

كان شارى الف جنينه..

شارى كل شئ

الشاشه..و نجوم الطريق

حتى الرفيق

و الرأى.. و الفكرالمضئ

و النص تانى..

كان ما هش لاقى صديق

مد الإيدين..للنص تانى..

هرب و زاغ

بيعانى ليل و نهار..

من الدنيا الفراغ

و القرش صاغ..

فى الجيب مصدى من زمن

بدا العطن

و العمر ضاع من غير تمن

و النص تانى..

قال لنصه التانى..

إن القرش فى الغربه..

وطن