التجربه رقم 65 من ديوانى عن الشخص الآخر

التجربه رقم 65 من ديوانى عن الشخص الآخر

قاللى..

*ما تتحرك *

رميت..

فى الطشت ..قرموط الحظوظ

و حلفت لازم يوم أفوز

و حاربت فى جيوش التتر..ويا الدروز

و فرضت نفسى ع الوسط

كان كل ما يشوفنى ..

فى أول صف..دايما ينبسط

شجعنى تانى على الوصول

و على الدخول ع المعمعه

قاللى..

*دا شاعر شحط..

شاعر جهل..

شاعر ضفدعه

خليك مع..قلمك..لأنك..مختلف *

لم نختلف فى الراى يومها و قلت له..

**عايزك سلف **

قاللى..

* ما انا و انت حبايب م الألف

بس انت شد الحيل..

و هات للخيل علف *

لحن انعزف

شريان نزف

عقرب قذف

شاعر دهب..

شاعر خزف

و..طلعت فوق البرج..

شافنى الكل أعلى م الهرم

دا لحد ما الكوز انخرم..

ويا الأوزون

جيبى نسى..شكل الأذون

و بحثت عن صراف..

أجيب منه الريال

ما لقيتشى غير حظى اللى مال

فرجعت طلخا..

لقيته بايع..فى العزال