التجربه رقم 68 من ديوانى عن الشخص الآخر
قاللى..
* فيه جواك غرور..
واضح ملامحه فى كل حاجه *
قاللى..
*شئ ها يطول فى شرحه..
بدون ديباجه *
قاللى..
*حاول.. .. .. ..*
قبل ما يكمل .. .. شَتمتُه
قبل ما يكمل.. .. كتَمتُه
و ابتديت بصراخ أناقشه
قولتله..
** دى مش طبيعتى **
قولتله..
** أنا حظى .. إن الساعه..ساعتى
كلهم أولادى..شربوا الحرف منى
كلهم عارفين بأنى..جزء منهم
عمرى ما ابعد لحظه عنهم **
قاللى..
* كل اللى انت قولته..
فيه دليل على إنك انت..
جبال تكبر *
قولتله..
** الله أكبر..إنت ظالم**
قاللى..
*فوق دايما لنفسك..و اوعى تنسى..
إنك انت رقصت..
فوق كل السلالم*
قولتله..
**أقوال .. رخيصه **
قولتله..
**سنتك .. كبيسه **
قولتله..
**الكل رافضك..الجوامع ..و الكنيسه **
قاللى..
* يا ناقص دراسه..ليه بتغلط ؟
مستحيل من تانى اصارحك
إنت ليه بتدارى جرحك..
بالحروف الأبجديه؟
اللى فات..صعبان علىً *
سابنى فجأه
و المفاجأه
إنى شفته فى كل ندوه
و الإيدين نايمه ف جيوبه
المفاجأه..
إنه لما ذكر عيوبى
إلتقيتها..
هى نفس جميع عيوبه
ليست هناك تعليقات:
إرسال تعليق