التجربه رقم 71 من ديوانى عن الشخص الآخر

التجربه رقم 71 من ديوانى عن الشخص الآخر

* هو انت مين ؟*

قالهالى..بعدين اختفى

رديت..

**انا..ويا اللى جاعوا..

ويا لابسين الحفا

ويا اللى عاشوا العمر كله..

ع السفا

ويا اللى باحث لسه عن نضاره..

أو نقطة شفا

ويا اللى مش طايلين دفا **

فاللى..

* يا غاوى الفقر..

روح قابل ساويرس..

هى دى الدنيا اللى فيها العز..

و الكافيار..

دى تبقى الدنيا جنبه..منصفه

سيبك بقى م الشحتفه *

انا قلت..

**فى زمن الجفا..

كل اللى طالبه لقمه..

بعد اللقمه..لازم اقول..كفا

يكفينى اغوص..

مش فى الفلوس..

فى المعرفه **

قاللى..

* الحياه..

محتاجه ألف و ألف حاجه..

بالدولار ..متكلفه *

أنا قلت..

**يكفينى حروف متكثفه

و سطور كتير متشرفه..

بحروفى..فى زمن التسكع..

و البهاق.. و الحنتفه **

قاللى..

*اجيبلك إيه يا شاعر ؟ *

قلت له..

**عندى طبق..على قدى..

مش محتاج حلل..

ولا..مغرفه **