وتدخل دورة الميّه 9 مرات
بتستنى ..
قدوم القطر جايب لحمه من ( تانزانيا ) .. تشويها
وتلعق فيها .. ( تعبان الجحور الخشنه .. يشبهلك )
وتستنى .. لعل القاضى يبعتلك مصليّه
تبيعها للى باع كل العزال .. وارتاح من النوَّه
خناجر جوع .. بتلحس عضمك اللى اتدارى من جوه
وبتهزك .. وبتجزك
وتحلب بزك العدمان من النومه
صراخ البومه يلحس ودنك المفتوحه
تجرى بدون مداس ع الباب
وتدخل دورة الميّه 9 مرات
وإيدك تترعش
لسه اللحوم .. والجيفه .. والأزميل على السكه
وتنسى مكه .. تنسى مدينه شاهده عليك
شبح واقف بيتهجى .. ويترجى المدد يوصل
مازال اللحم متأخر
مازال المرمر المدهوس تراب ..
ماوصلش من بره
مازلت بتترعش ..
جسدك بيترجاك تبص عليه
وتتوصى بأعضائه
لا يمكن داؤه هايسيبه
ولا هايجيبه غير لجهنم العاميه
يا ( دُميه ) جوه بحر الشهوه والأزميل
ما ترضخ للبهاق اللى ابتدى يظهر فى نظراتك
وتهجر عشها الخربان
من الولد القديم الحافى .. والغربان
ماتنساها .. عشان تلقاها جثه جوه ألف مكان
لا يمكن يوم هاتنسى هواك .. هاتتألم
بلاش تسمعها .. لو بدموعها تتكلم .. وقول ناسى
يتيمه .. قلبها عاصى .. مفيش إحساس
مفيش مبدأ .. مفيش إخلاص .. مفيش تفكير
إذا لمحت حصان أخضر .. تروح للغير
وتفرح لو تغير .. تدهس فى أعضائك
وتحضن كل أعدائك
ما تخرج بعد نص الليل
على النيل اللى ناده ليك .. وتتوضى
ماتركب مركبه فضه .. وتتاوب
عشان تقدر فى قبر الخوف
إذا سألك ملاك
تصحاله
وتجاوب
ليست هناك تعليقات:
إرسال تعليق