قال النبى

قال النبى

لما تجلى الله لـ ( طه ) فى غار حراء

جبريل سمع مِنُه القسم 

وهمسلُه : 

مكه هاتنقسم نصين فى سكة دعوتك

النُص هايخليه معاك

والتانى فى سكة شيطانُه هاينعزم

واما همسلُه بأن رب الكون معاه .. قلبه ابتسم

واما اترسم .. عصفور كناريا بألف لون ..

فوق كل ألوان الغصون .. الحاضنه فى ورق الشجر

الضوء فى قلب اللوحه ساد .. 

مع إن ليل العاصى كان خلاه فجر

فى غار حراء .. جبريل قعد ..

يشرح لعبد الله أصول الدعوه ويعيد اللى قال

كان الرسول .. عايم فى بحر من العرق

رغم التعب .. الوحى جوه عنيه برق

مبهور بنور الله وبالحرف العفيف

مبهور بجبريل اللى حط دراعه فوق كتفه الشريف

وهمسلُه إن الإختيار .. من فضل رب الكون عليك

الدين هايتحول أمانه بين إيديك

وهاتيجى لىَّ الغار أوصل ليك أمانة ربنا

الله فى نفس اللحظه واقف جنبنا

واضح فى راحة روحنا .. دقة قلبنا

قال الرسول : ( حسيت بفرحة طفل فى أول رضاعه ..

من حنان أمه اللى بصه عليه .. 

فى أول رضعه توصل للعروق

لما تجلى الله .. دخل صوت الشروق

جوايا فى لحظة تجلى مؤمنه )

آه يا سجود السوسنه .. ساعة مرور سِيدنا الحبيب

آه يا ركوع الزهره .. قدام البيبان الأحمديه المُبهره

آه يا آيات مكتوبه فوق السنبله .. فوق كل حبات الدره

آه يا رنين الآيه جوه المندره .. ليلة ما عاد إنسان حبيب

يا جسر ( جوز الطِيب ) يا خيل مبروك ..

على نور المقام فى الليل دخل

قلبى اتنخل .. لحبايب المختار ( قدح ) مليان دقيق

قلبى الرقيق اللى ابتدى ..

يعزف فى أول سيمفونيه مقدسه 

نزلت دموعه فى فصل خالى من فصول المدرسه

والمدرسه .. هى الحديث الآتى من روح الرسول

قال النبى : ( لما سمعت بروحى أصوات الخيول .. 

فى غار حراء قلبى ارتجف

والريق فى لحظة حب ويا الآيه جف

والدُف دق مع القلوب المسلمه .. 

مع لحن طاهر جوه صوته بنحتمى

زارنى الحبيب المنتمى لله 

وقال للروح يا نايمه تحلمى

ياللا بإسلامك وفضلُه هاتسلمى

ولمحت جوه حروفه صوت المأذنه

قبل ابتداء الدعوه .. قبل الناس ما تصبح مؤمنه

والمسجد النبوى الشريف اللى انحنى ..

لرسول مسير الكون يشوفه فى حُضنُه واقف مُنْحَنِى

الله رءوف الله حليم الله عليم الله كريم الله غنى )

فى الغار مع جبريل ظهر .. قمر النسيم السوسنى

فلا تحزنى يا أمة المختار ..

مسير الآيه هاتصدع جبال الضلمه .. 

وتدفى القلوب المسلمه

يا أمة المختار مسير الأرض هاتبوس السما

لحظة صلاتنا ع الحبيب .. سِيد الأمم

لحظة ما يتبرأ أمام المحكمه الإلهيه أصحاب الذمم

لحظة ما تتبرأ أمام المحكمه الإلهيه .. 

أرواح اللى رافضين العما

لحظة ما قاضى المحكمه .. 

يفرش لنا ع الأرض سجادة صلا

يبدأ بصوته فى الدعاء والبسمله

وياخدنا بالصوت الرخيم .. لنجوم شريفه فى العلا

ويقول لروحنا .. إعلى فوق جدا .. لربك واسجدى

زارنى الحبيب ( الأحمدى ) ؟

زارنى الحبيب ( الأحمدى ) ؟

فحضنته واترجيته يملى قُلتُه .. 

لجيوش عطاشه ع الطرق

كَرَمُه صبح فى الضلمه نجم حنان برق

وشرب مع الأرواح صفا

نهرُه شبع م الحب والعطف الشريف والمعرفه

كان فى القمر .. من مُده جزء بينطفى

عاد الضيّا من تانى واكتمل القمر

رجع الشجر من تانى يرسم ع الحجر ..

فى غار حراء .. توته بألف وألف لون

والكل صلى على اللى ( حَنْ ) و ( أَنْ ) .. 

جذع النخله ساعة قعدته

وبرك على ضِلُه الجمل 

وسجد على كتفه يمام بجناح أمل

وحماه إله الكون فى رحله مقدسه

الكل صلى ع الرسول اللى صبح .. 

أستاذ عظيم فى المدرسه

والمدرسه .. مفتوحه لسه فى الفصول الأربعه

كان ضد طول الليل .. وكان دايما مع ..

سِيل الضيّا الممدود من الأرض البراح ..

للقلب لو مؤمن وطاهره دقتُه

زارنى الحبيب .. مع دخلتُه .. إرتحت من كُتر القلق

سبحانه هو اللى خلق

قلبه الحبيب الصافى لاجل يدق بابنا بانتظام

ويجيب لنا الإسلام عشان نقدر نكون

جبريل ظهر فى الكون عشان .. 

يعلن بأن الدعوه هى الأمنيه

وسمعت من قلبه الحروف النابعه .. 

من أسرار ختام الأنبيا

قدم ( عناقيد الضيا ) .. للدنيا .. زانت حُسنها

قلعت بقايا حُزنها واتبسمت

عناقيد آيات الحب بيننا اتقسمت

وفرحنا .. كان مصباحنا شلال الحديث

أصبح ( على ) لينا جليس

( أبو بكر ) .. و ( الصديق عمر )

رجع القمر من تانى يدخل فى الوريد

رجع الوليد من تانى .. يرضع حب من أم الصفا

الله يا سِيدى المصطفى

الله يا مولايا اللى جانى الفجر من عند الإله

الله على اللى أخدنى من لحظة ميلادى للإله

الله على اللى هواه صلاه

الله عليه .. لما همس للدنيا لازم تحلمى بالأمنيات

زارنى الحبيب وياه آيات

وندانى واتهجانى حرف نورانى .. جانى بالعناقيد الإلهى ..

وتانى خدنى لدايره طاهره معطره 

الكلمه للولد اليتيم مُهرة شبع .. 

والحرف للبنت اليتيمه إسوره

ووصل لروح الدنيا فى كل الوجود .. فاتبسمت

واتنسمت منه الحنان الأحمدى

آه يا حبيبى يا سيِّدى .. يا نفحة الزهر الندِّى

يا شعاع طريقنا السرمدى .. آدى يدى

ممدوده للرحمن أطول المغفره

الذنب بيرجعنى .. ميت مليون سنه واكتر ورا

والخالق الرحمن لنا قد أنذر

لكننا راكبين خيول الذنب .. مش داريين بآخر عمرنا

أشياء كتير فى الزحمه حاكمه أمرنا

ونسينا أنهار الأمانى الطاهره والموج الحبيب الزمزمى

زارنى الحبيب قبل الميعاد .. الشمس باركت سكتى

باست فى كفه كفتى .. نزلت فى نهره دفتى

وزرعت زاويه من زوايا الأرض بالشِعر الحلال

صلينا بعد أدان بلال .. 

وبكينا ويا حروف مصابيح الضيا 

ووقفنا .. كان لينا الإمام .. طه ختام الأنبيا

والأمنيه .. حققها قلبى وقلبه فى سجدة وفا

علمنى قلب المصطفى يبقى الكرم .. لاجل الأحبه ..

( حاتمى ) مالهوش حدود

زارنى الحبيب علشان أسود .. 

ع الأرض بالإسلام بآيه مقدسه

جوه الصباح .. جوه المسا

مسح الدموع الطاهره من فوق الورق

بعدين برق .. جوه العيون اللى انطفت

جوه السحابه اللى اختفت .. من بعد ما جف المطر

الطفل م الحزن انفطر .. 

وفطر حليب غامق لأن الأب مات

والأم تاهت من سكات

والدنيا بانِت رغم شمس الكون حزينه مغيمه

العاصى قال ليها يا دنيا غيِّمى على كل شئ

زارنى الحبيب خلى الطريق .. أخضر مضئ

واتوضى جنبى من عصير النهر قبل ما يردموه

فى السجده نزلت دمعه واتذكر أبوه

واتذكر الأم الحبيبه والدُعا

الله لروحنا بعد جبريل اللى جانا قد دعا

واما دعا .. لبينا فى أشرف ندا

الورده رغم شبعها محتاجه ندى

قمر العطاء .. عمره فى يوم ما يضيع سُدى

ولا عمره يغزل غير حرير الكعبه .. غير فرس الحرم

الحبه جوه السنبله .. أكبر وأكتر م الهرم

واللى انحرم .. ربك ضرورى يعوضُه

وان يوم تِعب بيعودُه .. ع الجرح والليل الشحيح

قلب اليمام لو بات جريح

يتهز كل الكون لحزنُه وانكساره فى الرياح

أنا مُصحفى هو السلاح .. لىّ أمام جيش الذنوب 

الرب عالم بالقلوب

وانا قلبى لسه بحب متعلق على قماش المقام الأحمدى

الحب هو سَيِّدى

والرب حارس قلبى من نار النهايه المزعجه

قلبى زرعته بنفسجه

ورسمتُه آية حب جوه الأنسجه

وسمعت صوت الضىّ نص الليل ..

بيهمس تانى للروح الجريحه .. إسلمى

زارنى الحبيب من تانى .. نزلت دمعتى .. ولقيتنى طاير فى السما

طه رفعنى لفوق وخلى القلب من حُبه سما

ورسم على أوراقى عنقود الضيّا

صليت بقلبى الصافى أيوه ناديت إمام الأنبيا

فسمح لروحى بالدخول

صليت بشوق .. نزلت سيول .. من عند رب العالمين 

تِلعن غراب البين فى شكله ( الأُنسوى )

الله عزيز .. الله مجير .. الله قوى 

الله أخدنى لجنه طاهره بدون حدود .. 

وبدون قزاز .. وبدون إبر

الله بيحمى اللى صبر ويقدره

مين غيره يقدر يسنده .. ويصبره

مين غيره قادر ع الشفا

آه يا حديث المصطفى .. جوه قلوبنا المتعبه

آه يا نجومنا الخضره من قبل الصبا

للروح همس .. لو تذنبى .. 

لازم فى ليله هاتندمى مهما حصل

زارنى الحبيب والنور وصل

ومعاه ( دوا ) ربانى للخيل اللى تعبت م الرحيل

شال الضلام .. من ضلمه داخل أى ليل

داوى فى صاحب جرح .. لو مجروح بإيد كافر عنيد

م الإيد .. يشيل بحنانه قيد .. دايس عليها من زمن

الضىّ فى الغربه وطن .. 

والصمت فى الوطن اغتراب

وانا مش هاقول أبدا ( أنا )

وانا مش هاقول الزور هنا .. أصبح حروف متلحنه

وانا مش هاقول الكدب فجأه حولوه لقانون غبى

آه يا حديث سِيدنا النبى

أنا مش هاقول إن السياده .. للخسيس اللولبى

وان احنا حاضنين الوجع والجمره .. نمنا ع الحروق

وان القزاز دخل العروق من غير سبب

من غير سبب ؟ .. كان السبب :

الصدق ويا النفس مهما الحال يميل

الوقفه ويا الحق فى الزمن العويل

عدم الرياء والكدب ونفاق الغنم

عدم الرضوخ والإنحناء قدام صنم

عدم الإهانه لقلب مش قادر يقول .. للكدابين أبدا نعم

وأهم شئ .. الإحترام والحب دايما للقلم

علشان يقول للأرض قومى اتكلمى .. 

إوعى تخافى م الكلام

زارنى الحبيب .. نور المحبه والسلام

وغسل فى كف السكه من نهر الحروف

واتوضى من ضىّ الرءوف

واتحنى بالمطر اللى باس الطفل قبل ما يفطموه

وحلف ما نجمه تتوه فى أحضان السما

ولا إيد دنيئه .. تشد من قلب الوريد كل الدما 

ولا ديب يدوس بحوافره أعظم ملحمه

ولا حاجه تحمى قلوبنا غير حامى الحما

وهمس لشمس العطف .. لازم ع الجميع تتقسمى

زارنى الحبيب .. وهمس لروحى اتنسمى

شاف النفوس متكسره .. شاف القلوب متحيره

شاف العيون متحجره .. شاف الوجوه متغيره

معجونه بتراب القلق

( عناقيد ضيا ) .. والوجه بان .. سبحانه هو اللى خلق

سبحانه خلى الحرف يقدر ينطلق

ويبوس جميع الدنيا يِوهبها العطا

يصبح شتا فوق الجفاف .. يصبح لحاف يصبح غطا

ويكون ( عطا ) .. للمحتاجين ملح الحياه

ينطقها آه .. ويدوب فى حضن قرنفله

يمحى الحاجات المخجله .. ويدوب حياء

يا رمز للفجر الشريف والكبرياء

يا فِكر سابق فى الزمن

قلبك وطن للعاشقين المغرمين

وعنيك سكن للهربانين .. من قسوة الزمن الصعيب

وياك تطيب كل القلوب من لمستك

وياك تطيب الرعشه .. تهدى بشمستك

مع همستك .. فوق كل أوراق الوصول

تبكى معانا يا رسول .. وتضمنا

كانت رقيقه وطيبه .. وشريفه جدا أمنا

كنا بنورها بنحتمى .. مهما تطول بينا الدروب

زارنى الحبيب هادى القلوب

وفتح كتابه اتفجرت .. 

كل الحروف بالنور وبالقول العفى

قمرُه الوفى .. نام فوق سطوح الفجر ديك

يا رب واحد فى الوجود مالهوش شريك

إحمينا من شر السموم

لو متداريّه ونايمه فى سن القلم

واجعلنا فى الدنيا علم .. مرسوم عليه ( عناقيد ضيا )

نصبح زهور إلهيه فى سكة .. إمام الخير .. ختام الأنبيا

نصبح حروف الصدق داخل أغنيه ..

للهادى مصباح الدخول للعرش .. للقُول الشريف

أعجن فى قلبى لاجل كل الناس رغيف

وأكون على المدنه بلال

أشبع من الطبق الحلال

وأقول لروحى .. فى الرءوف اتعشمى

زارنى الحبيب الصافى قال للروح تعالى واسلمى

وهمسلى يا بخت اللى فاز

فهمست ليه : أرجوك تكون الورده ..

فارده غصونها للقلب اللى عاز

تمسح قزاز الصبر من قدم الحصان

تصبح فى شوك الدنيا نسمة سيسبان

قارب نجاه .. فدان حنان 

إنسان بروح إنسان بيطفى فى الطوفان

وان شفت يوم فى بلدنا جيش ( كفار قريش )

بيرددوا : ( يسقط يعيش ) 

كون جوه كل مكان أدان 

يا اللى انت جوه الروح رسولنا من زمان

جبريل ما زال فى قلوبنا نور مالهوش حدود

جبريل ما زال فى الروح ورود مالهاش عدد

يا اللى انت جيبت رساله لينا مهدت .. لبداية اللعمر الطويل

جنه مفيش ليها مثيل

قد السما والأرض والكون البراح

جبريل فى غار الحب بعد ما علمك .. علمتنا معنى السماح

وخرجت بره حراء دموعك ع الهدوم

زالت صحيح كل الهموم

لكن حمولتك أصبحت زى الجبل

وهاتعمل ايه فى المشركين المزروعين جوه الصنم

مين اللى هايقلك نعم

مين اللى هايصدق بأن الله فى كل مكان ضيا

وانك رسول الله ختام الأنبيا

جبريل فرح بلقاك .. فرحت بدخلته بالنور عليك

كان كل لحظه عنيك تبص عليه بفرحه وشوق أصيل

أصبحت للعالم دليل .. باين شعاعه من بعيد

أصبحت عيد للمتعبين المحتاجين دايما لعيد

عمرك ما كنت فى يوم وحيد .. 

حتى يا طه فى غار حراء

كان ضىّ جبريل اللى جايلك م الإله .. 

مالى عليك كل الجهات

داخل عليك الغار يا أحمد من سكات

حتى فى طَبْطَبتُه عليك .. كان زى نسمه مؤمنه

شفافه .. بيضه حنينه

الغار فرح .. لما لمح جبريل معاك

كفار فى كل مكان هنا .. وانت هناك

فاتح وريد القلب للدين اللى هاينضف ربوع كل الحياه

ويغيّر الكون اللى ماشى فى اتجاه مليون صنم

الله ناداك رديت نعم

نزلت رسالته عليك يا قنديل الوجود

اللى صبح وياك وجود 

أشعلت بركان الخلود .. وبقيت نبى وبقيت رسول

كان جوه قلب الغار جنود بصه عليك

الله على دمعة عنيك .. ساعة نزول جبريل إليك شايل نبأ

الله عليك بدأ السبق .. بينك وبين كفار شُداد

بينك وبين أكبر ( عتاد ) فى المنطقه

أعلنت فى رسالتك وقفت على الجبل

تتحدى حبل المشنقه

وصلبت عودك .. كنت واتحملت واتجمِلت .. 

واتكملت بالدين الحنيف

ولا خفت من كل الطغاه

صبحت جموع النور معاك أعظم سند

وهبك إله الناس سند

كتروا الآيات فى مكه .. زاد النور وفاض

ولا حد بعدك راح على الغار اللى أصبح معجزه

ولا حد فى الدنيا انجرح قدك وداس فوق الهلاك

فى البدء كان وياك إله العالمين

أصبح معاك ملايين .. 

وكل صديق بميت مليون صديق

وما زلت فى العالم مضئ

بس الخوارج لسه بيننا يا رسول

بيدوسوا فوق قمر الأصول

وبيقفلوا كل الفصول فى المدرسه

بس انت لسه بتمشى بيننا كلنا صبح ومسا

أحاديث شريفه مخلصه

بتريَّح القلب الحزين من كل شئ

الضيق .. وألف مضيق .. وشلال الأسا