التجربه رقم 60 من ديوانى عن الشخص الآخر

التجربه رقم 60 من ديوانى عن الشخص الآخر

و..قعدت جوه القاعه..

فوق مليون منصه..أبتسم

ضوء الفلاش..

خلانى مش قادر أشوف

كان كل شئ جوايا..

لسه بينقسم..

من خنقتى ويا الظروف

فضلت عنيه تطوف..

على الحشد الرهيب

و..انا الحبيب..

للست هانم..

كنت سارح فى اللى كان..

و اللى حصل

عودت نفسى ع الكسل

و..على انتظارها ليل نهار

ضيعت وقتى فى الدخول..

جواها..أو..فى الإنتظار

ليلى مفيش بعده نهار

و..مفيش فرج

فجاه صرخ..و..واجهنى..

*مش هاتفوق بقى ؟*

رديت عليه..

**إنت اللى مش فايق..

و متضايق لأنى منتشر **

قاللى..

*دا شئ جوه الهوا *

أنا قولتله..

**يا الله نعيش تانى سوا **

قاللى..

*أنا مجتاج دوا..

محتاج دما*

بعديها مات

مات من سكات

بصيت يوميها للسما

شفت النجوم متألمه

من بعد ما سابنى فى حيره..و اختفى

بصيت لنفسى فى المرايه..

لقيتنى رغم الشهره..

رغم الإنتشار الوهمى..

ناقص..جمجمه